Kolonët hebrenj ngritën një tendë jashtë një shtëpie palestineze në fshatin Kusra në Bregun e okupuar Perëndimor të premten përpara se të mbërrinin ushtarët izraelitë dhe ajo të rrëzohej, ndërsa kolonët po vazhdonin një rrethim që palestinezët thonë se synon t'i dëbojë ata nga toka e tyre. Kolonët kanë rrethuar shtëpitë në Kusra për gati një javë, duke intensifikuar presionin mbi palestinezët në një zonë ku grupet e të drejtave thonë se kolonët po bëjnë një përpjekje të përbashkët për të okupuar më shumë toka, duke u shturë akoma më tej në territorin ku palestinezët synojnë të krijojnë një shtet. Rrethimi ka tërhequr kritika nga SHBA-të dhe zyrtarët e Shtëpisë së Bardhë po bëjnë presion që kryeministri izraelit Benjamin Netanyahu të dënojë publikisht rrethimin. Uashingtoni filloi të protestonte pasi mësoi se shtëpia e një palestinezo-amerikani ishte mes atyre nën rrethim, thanë dy zyrtarë, që folën në kushte anonimiteti. Vetë kryeministri izraelit, Benjamin Netanyahu nuk ka bërë komente. Qeveria e tij, më e djathta në historinë e Izraelit, ka udhëhequr një zgjerim të shpejtë të vendbanimeve në Bregun Perëndimor, territor i pushtuar nga Izraeli në luftën e vitit 1967. Izraeli ka krijuar dhjetëra vendbanime të reja në zonë.