Prokuroria e Financave dhe Antimafia italiane për trafikun ndërkombëtar të drogës, kanë goditur një grup kriminal, shqiptarësh dhe italianë. Pas përfundimit të hetimit, janë lëshuar 30 masa paraprake, ku 23 persona u arrestuan, 6 në “arrest shtëpie”, një me “detyrim paraqitje”. Sipas Corriere Della Sera, dy shqiptar vëllezër 44 dhe 38 vjeç kordinonin pjesëtarët e tjerë të grupit drogën që mbërrinte në portin e Livornos nga Ekuadori. 44-vjeçari, ishte organizatori i “degës” toskane të bandës, i cili me kriptofon mbante kontakte telefonike me bashkëpunëtorët e tij në Ekuador, ata që financonin blerjen e drogës direkt në Kolumbi dhe menaxhonte momentin më delikat të importit të drogës, atë të “daljes” nga porti. Media italiane shpjegon se ngarkesat e kokainës bliheshin në Kolumbi, duke mbërritur në Itali nga Ekuadori dhe fshiheshin mes arkave me banane ose frutave të tjera ekzotike.