Një sasi kokaine, një armë zjarri, disa byrzylyk flori si dhe një shumë monetare u sekuestruan në Portin e Durrësit nga policia. Aksioni I koduar Full Scan u zhvillua pas informacioneve të siguruara në rrugë operative nga ana e agjentëve se sende të kundraligjshme do të futeshin në territorin shqiptar me një autobus te linjës nga Italia. Agjentët e policisë kufitare menjëherë ushtruan kontroll të imtësishëm në vijën e dytë në autobusin që drejtohej nga 42-vjeçari Dritan Ferrunaj, ku brenda një çante shpine u gjetën 29 000 euro, një pistoletë, me pesë krehra, të cilat u sekuestruan në cilësinë e provës materiale. Po ashtu në çantën marsup të shoferit u konstatua 92 gramë kokainë dhe bizhuteritë e floririt. Lidhur me rastin po vijojnë hetimet, ndërsa ndaj drejtuesit të mjetit rëndojnë 10 vepra penale mes të cilave ajo e "Trafikimit të lëndëve narkotike”, e trafikut të armëve.