Më shumë se 3.3 tonë kokainë janë sekuestruar në një operacion të përbashkët nga autoritetet spanjolle dhe portugeze në rajonin e Costa del Sol dhe në Portugali. Tre persona u arrestuan, dy prej tw cilve në Spanjë dhe një në Portugali. Ata akuzohen si anëtar të rrjetit kriminal të trafikut të drogës. Të arrestuarit përballen me akuza që përfshijnë pjesëmarrje në një organizatë kriminale, trafik droge, posedim të paligjshëm të armëve, sulm ndaj oficerëve të policisë dhe shkelje të rregullave të sigurisë rrugore. Grupi u godit pas një informacioni të mbërritur tek agjentët spanjollë se një furgon po transportonte një sasi droge nga Portugalia. Hetimet i çuan autoritetet në një pronë në Torremolinos, ku u gjetën sasi të mëdha droge. Përveç sasive të mëdha të kokainës, autoritetet sekuestruan gjithsej tre armë, dy automjete dhe afërsisht 1,100 euro në para të gatshme. Në posedim të të dyshuarve u gjetën gjithashtu kamera mbikëqyrjeje, pajisje shikimi natën dhe pajisje komunikimi, elementë që po shqyrtohen nga autoritetet si pjesë e hetimit se si funksionon rrjeti.