Bashkimi Evropian duhet të përqendrohet në një paketë të re sanksionesh për të mbytur ekonominë e Rusisë dhe për të detyruar Presidentin Vladimir Putin të përfundojë luftën në Ukrainë, tha të mërkurën ministri i jashtëm francez. Duke folur pasi BE miratoi paketën e 17-të të sanksioneve, Jean-Noel Barrot tha se ndikimi i sanksioneve deri më tani ka qenë i pamjaftueshëm dhe blloku duhet të bashkëpunojë me Shtetet e Bashkuara, ku Kongresi ka përgatitur masa shkatërruese nëse Presidenti Donald Trump vendos të ushtrojë presion mbi Moskën. "Ne po miratojmë sot një paketë të 17-të sanksionesh", tha Barrot. "Do të na duhet të shkojmë më tej sepse sanksionet deri më tani nuk e kanë dekurajuar Vladimir Putinin nga vazhdimi i luftës së tij. Prandaj, duhet të përgatitemi për të zgjeruar sanksionet shkatërruese që mund ta mbytin njëherë e përgjithmonë ekonominë e Rusisë". Paketa e 17-të vë nën sanksione rreth 200 anije të 'flotës në hije' të rusisë. Dy vende ende duhet të konsultohen me parlamentet e tyre mbi detajet, por paketa pritet të miratohet javën tjetër nga ministrat e jashtëm të bllokut, thanë burime diplomatike. Shtrëngimi i fundit vjen ndërsa Moska dhe Kievi mund të zhvillojnë bisedimet e tyre të para për paqen në Stamboll të enjten. Përveç anijeve, paketa e re shton kufizimet për 30 kompani të përfshira në tregtinë e mallrave me përdorim të dyfishtë, ndërsa 75 individë dhe subjekte do të listohen për lidhjet e tyre me kompleksin ushtarako-industrial të Rusisë.