Mazhoranca po vëzhgon nga distanca dhe në heshtje përballjen e Sali Berishës me drejtësinë, edhe pse kjo përballje buroi nga një padi e ngritur prej tyre që në vitin 2020. Teksa Prokuroria e Posaçme çoi përpara hetimet dhe Gjykata vendosi masën e sigurisë detyrim paraqitje për ish-Kryeministrin, për dosjen që e ka pikënisjen në kallëzimin e depozituar nga Taulant Balla, si nga qeveria ashtu edhe nga Partia Socialiste ndodhen në një heshtje totale duke shmangur çdo formë komenti, apo dalje publike për dosjen ‘Partizani’. Burimet bëjnë me dije se ka një dakordësi dhe direktiva të qarta brenda selisë së Partisë Socialiste, për të mos u prononcuar në lidhje me hetimet e drejtësisë së re, për ta lënë gjyqësorin të ushtrojë i pavarur funksionin e tij dhe mbi të gjitha për të mos ushqyer alibinë e Sali Berishës për një proces politik ndaj tij.