Krimi ekonomik dhe ai kompjuterik nuk mund të mendohen, nëse në Polici nuk do të ishin funksionale edhe njësia e informacionit dhe ajo e personave në kërkim. Kësisoj, 4 njësitë që kanë kodet e tyre të posaçme tashmë nga Policia janë njësia “E” e krimit ekonomik, njësia “I” e informacionit, njësia “K” e personave në kërkim dhe njësia “C” e krimit kompjuterik. Këto kode që janë vendosur dhe njihen nga strukturat e Policisë kanë edhe një detaj jo pak të rëndësishëm. Efektivët e tyre janë “anonimë”. Jo në kuptimin klasik të fjalës anonim. Por, ata njihen nga kolegët vetëm me numrat që mbajnë në uniformë dhe jo me identitetet. Dhe kjo ka një shpjegim thonë autoritetet. Duke qenë se janë krime të një natyre krejt tjetër nga ajo e përditshmërisë për rendin dhe sigurinë publike, identifikimi do të prodhonte rrjedhje të informacionit. Në jo pak raste ka ndodhur që shumë operacione për kapjen e personave të kërkuar kanë dështuar, pasi personi, apo grupi i personave janë njoftuar më parë për operacionet e Policisë. Krahas shumë angazhimeve dhe prioriteteve të Policisë së Shtetit, lufta kundër krimit të organizuar kryeson listën e të gjithë prioriteteve dhe angazhimeve, pavarësisht se në jo pak raste SPAK ka rrëzuar vendimet e OFL, duke i konsideruar në tejkalim të ligjit special.