Kryetari i bashkisë së Kievit, Vitali Klitschko, thotë për gazetën gjermane Der Spiegel se Ukraina po shkon drejt autoritarizmit, duke lëshuar kështu një kritikë të kamufluar ndaj Presidentit Volodymyr Zelensky. “Në një moment ne nuk do të jemi më ndryshe nga Rusia, ku gjithçka varet nga tekat e një njeriu”, tha ish-kampioni i boksit në peshat e rënda në intervistë. Kryebashkiaku i Kievit tha se Ukraina ishte pa lider dhe kaotike në muajt e parë të luftës në shkallë të gjerë dhe vlerësoi kryebashkiakët e Ukrainës që luanin role kryesore udhëheqëse, duke mbrojtur banorët e tyre dhe duke mbështetur ushtrinë. Por Klitschko tha se beson se Zyra e Presidentit i sheh kryetarët e bashkive thjesht si një pengesë për centralizimin e pushtetit. Pavarësisht se është kryebashkiak i kryeqytetit të Ukrainës, Klitschko tha se nuk ka folur me Zelenskin që nga fillimi i pushtimit në shkallë të gjerë. Administrata e Zelenskit nuk ka qenë shumë e kënaqur me trajtimin e mbrojtjes së Kievit nga Klitschko që nga shkurti i vitit 2022. Në komentet publike të presidencës, kryebashkiaku në detyrë është kritikuar shpesh për kushtet jo të mira në vendstrehimet dhe bunkerët e qytetit si edhe për ndërprerjet e zgjatura të energjisë elektrike. Klitschko dhe Zelensky janë përplasur që nga viti i parë i presidentit në detyrë. Përplasja mes tyre ka cuar në hetime të përsëritura dhe në përpjekje për ta larguar kreun e bashkisë nga administrata shtetërore e qytetit të Kievit.