Presidenti Trump do t'u kërkojë vendeve që duan të bashkohen me "Bordin e Paqes" të tij për të mbikëqyrur Gazën që të paguajnë 1 miliard dollarë për anëtarësim. Bloomberg dhe The Atlantic duke iu referuar një draft statuti të parë nga gazetarët e tyre sqaruan se Trump do të shërbejë si kryetar I parë I bordit ekzekutiv, ku dhe do të miratojë se cilat shtete mund të bashkohen me të në bord. Ai do të miratohet me kushtin që tre nga shtetet anëtarë të bien dakord me statutin, "Çdo Shtet Anëtar do të shërbejë për një mandat jo më shumë se tre vjet nga hyrja në fuqi e kësaj Karte, me kusht rinovimin nga Kryetari", thuhet në draft, sipas Bloomberg. "Afati tre-vjeçar i anëtarësimit nuk do të zbatohet për Shtetet Anëtare që kontribuojnë më shumë se 1,000,000,000 dollarë amerikanë fonde për Bordin e Paqes brenda vitit të parë të hyrjes në fuqi të Kartës.", shkruan Bloomberg që thekson më tej se shtetet anëtare do të jenë në gjendje të votojnë për vendimet e bordit, por Trump do të ketë autoritetin e vetëm për t'i miratuar ato. Ndërkohë mbetet ende e paqartë se si do të financohen paratë që do të depozitoj secili shtet. Gazeta Atlantik raportoi se draft statuti nuk trajton se ku shkojnë tarifat e anëtarësimit, vetëm se financimi për shpenzimet e bordit do të bëhet “përmes financimit vullnetar nga Shtetet Anëtare, Shtete të tjera, organizata ose burime të tjera”. Ndërkohë Shtëpia e Bardhë, sipas Reuters, e quajti raportin "mashtrues" dhe tha se nuk ka një tarifë minimale anëtarësimi për t'u bashkuar me "Bordin e Paqes". “Kjo thjesht u ofron anëtarësim të përhershëm vendeve partnere që demonstrojnë angazhim të thellë për paqen, sigurinë dhe prosperitetin”, tha Shtëpia e Bardhë në X. Ndërkohë Departamenti Amerikan i Shtetit iu përgjigj pyetjes së Reuters mbi këtë çështje duke iu referuar postimeve të mëparshme në mediat sociale rreth bordit nga Trump dhe i dërguari i tij i posaçëm Steve Witkoff, të cilat nuk e përmendën numrin.