Qeveria e Kosovës u vendosi sanksione shtatë biznesmenëve dhe një kompanie për lidhje me grupin ushtarak të Libanit, Hezbollah. Ministrja e Jashtme e Kosovës, Donika Gërvalla-Schëarz, tha se sanksionet vendosen në pajtim me Rezolutën 1373 të Këshillit të Sigurimit të Kombeve të Bashkuara ndaj shtatë individëve dhe një kompanie "për lidhjet e tyre me organizatën terroriste Hezbollah dhe rolin e tyre në rrjetin financiar të saj në Gadishullin Arabik”. Ministrja Gërvalla, tha se një vendim i tillë do të kontribuojë për partneritet më të ngushtë me Shtetet e Bashkuara dhe partnerët tjerë të rëndësishëm, në mbrojtjen e vlerave të përbashkëta. Ndërsa kryeministri, Albin Kurti, tha se "Kosova është e angazhuar drejtpërdrejt në luftën kundër terrorizmit, radikalizmit dhe ekstremizmit të dhunshëm përmes afirmimit ligjor, qasjes strategjike dhe veprimeve ekzekutive si dhe pjesëmarrjes aktive në Koalicionin Global". Sanksionet nënkuptojnë ngrirjen e pasurive ndalimin e udhëtimit dhe të vënies në dispozicion të fondeve nga individët dhe entitetet në Kosovë. Vendimi është në pajtim me sanksionet e Shteteve të Bashkuara ndaj Hezbollahut, një fraksion i fuqishëm shiit që ka deputetë në Parlamentin e Libanit. Libani nuk e njeh pavarësinë e Kosovës e cila nuk mbështetet as nga palestinezët. Në qershor të vitit 2020, edhe Kosova e shpalli organizatë terroriste krahun politik dhe atë ushtarak të Hezbollahut. Kosova është pjesë e koalicionit global kundër terrorizmit, ndërsa është përqendruar për një kohë të gjatë në ndërprerjen e valës së luftëtarëve të huaj dhe pengimin e financimit të grupeve terroriste.