Shtetet e Bashkuara të Amerikës kanë shprehur shqetësim të thellë pasi Kina ka testuar një raketë strategjike të lëshuar nga një nëndetëse në oqeanin Paqësor. “Në një moment kur SHBA angazhohet më shumë se kurrë për të parandaluar përhapjen e armëve bërthamore, Kina bën të kundërtën. Zgjerimi i shpejtë i arsenalit bërthamor të Pekinit është motiv për shqetësim të thellë për rajonin dhe botën”, shkruan departamenti amerikan i shtetit në një deklaratë. Por, një opinion i kundërt, ka ardhur nga Rusia. Duke komentuar testimin e raketës kineze, zëdhënësi i Kremlinit Dmitry Peskov tha se Kina ka të drejtën sovrane të testojë raketat e saj dhe nuk përfaqëson një kërcënim për asnjë vend tjetër. “Ne mendojmë se është një e drejtë sovrane e Kinës të testojë raketat e saj dhe të angazhohet në forcimin e ushtrisë. Kina, nuk kërcënon asnjë vend të rajonit dhe asnjë vend të botës. Kina është një aleate e madhe e jona dhe një partnere e besueshme”, tha Zëdhënësi i Putinit.