Dy balona kineze fluturuan në veri të Tajvanit, tha Ministria tajvaneze e Mbrojtjes, ndërsa Kina ka rritur presionin ndaj ishullit që vetëqeveriset e që pretendon se i përket asaj, para zgjedhjeve presidenciale të janarit. Balonat kaluan në Ngushticën e Tajvanit që ndan ishullin nga Kina dhe u pikasën të dielën rreth 204 kilometra në veriperëndim të qytetit-port të Kilungut, tha Ministria. Kjo është hera e dytë gjatë këtij muaji që Tajvani raporton për balona kineze afër territorit të tij, pasi një balonë kishte kaluar mbi Kilung më 7 dhjetor. Potenciali i Kinës për të përdorur balona të motit për të spiunuar qeveritë e tjera u vu në qendër të vëmendjes më herët gjatë këtij viti, kur Shtetet e Bashkuara rrëzuan një balonë të dyshuar spiunazhi të Kinës mbi Oqeanin Atlantik, veprim që nxiti zemërim në Kinë. Ministria e Mbrojtjes së Tajvanit nuk tha nëse dyshon se balonat janë përdorur për spiunazh apo jo. Ndërkaq, Ministria e Jashtme e Kinës nuk ka bërë ende komente për pretendimet tajvaneze. Pekini ka rritur presionin ndaj Tajvanit duke dërguar avionë ushtarakë dhe luftanije afër ishullit pothuajse në baza ditore. Taipei po përgatitet të mbajë zgjedhjet presidenciale më 13 janar. Kandidati kryesor në zgjedhje është zëvendëspresidenti Ëilliam Lai. Ai është kritikuar nga Pekini dhe Kina e ka cilësuar si “separatist”. Tajvani u nda nga Kina gjatë luftës civile më 1949, por Pekini vazhdon të pretendojë se ishulli me 23 milionë banorë është territor kinez, duke mos përjashtuar as mundësinë e përdorimit të forcës që ta rimarrë atë.