Kina po ndjek me shumë vëmendje se si po reagojnë Uashingtoni dhe bota ndaj agresionit rus të Ukrainës, por ende nuk e kanë kaluar kufirin e dhënies së ndihmës vdekjeprurëse për Moskën, tha të mërkurën Sekretari amerikan i Shtetit, Antony Blinken. Duke folur pas vizitës së presidentit kinez Xi Jinping në Moskë, Blinken tha në një seancë në Senat se nëse Rusia do të tolerohej pa u ndëshkuar pas sulmit ndaj fqinjit të saj, kjo do të "hapte një kuti Pandore" për agresorët e mundshëm duke i hapur rrugën një "bote konflikti"."Pasojat e asaj që po ndodh në Ukrainë shkojnë përtej Ukrainës. Mendoj se do të kenë një ndikim të thellë në Azi, për shembull," tha Blinken, duke vënë në dukje se Japonia dhe Koreja e Jugut kanë qenë mbështetës kryesorë të Ukrainës gjatë konfliktit. Megjithatë, ai tha se nuk beson se Kina i ka ofruar ndihmë vdekjeprurëse Moskës. "Deri më sot, nuk kemi parë që ata ta kapërcejnë këtë vijë," tha Blinken para një komisioni të Senatit.