Kina emeton më shumë gazra që shkaktojnë efektin serë sesa të gjitha kombet e zhvilluara në kombinim, është thënë në një studim të kryer nga Grupi Rhodium. Sipas raportit, Kina ka emetuar 27 për qind të të gjitha gazrave serrë në botë më 2019. Shtetet e Bashkuara kanë qenë në vendin e dytë më 11 për qind, derisa India e treta me 6.6 për qind të të gjitha emetimeve botërore, ka thënë instituti me bazë në SHBA. Shkencëtarët kanë paralajmëruar se pa një marrëveshje në mes të SHBA-së dhe Kinës, do të jetë e vështirë që të parandalohen ndryshimet e rrezikshme klimatike. Emetimet e Kinës janë përtej trefishuar në tri dekadat paraprake, ka thënë instituti. Gjiganti aziatik ka popullsinë më të madhe në botë, dhe emetimet për kokë banori janë ende larg më të mira sesa ato të SHBA-së, mirëpo sipas hulumtimit, këto emetime janë rritur po ashtu, përkatësisht për trefish në dy dekada. Kina është zotuar për të arritur në emetime zero të gazrave serrë deri më 2060. Presidenti kinez Xi Jinping ka ritheksuar zotimin e tij në një samit për klimën, të organizuar nga presidenti amerikan Joe Biden, muajin e kaluar. Megjithatë, Kina është tejet e varur nga qymyri. Ky shtet aktualisht ka 1,058 termocentrale me qymyr, më shumë se gjysma e kapacitetit botëror. Sipas Marrëveshjes së Parisit për Klimën, të arritur më 2015, 197 shtete janë pajtuar për kufizim të temperaturës së Tokës nën 2 gradë Celsius. Megjithatë, bota është larg atij objektivi.