Kina ka zhvilluar stërvitje detare dhe ajrore të mërkurën afër Cekëtinës të kontestuar Skarboro, një zonë e pabanuar me shkëmbinj nënujorë, që i është marrë Filipineve në Detin Jugor të Kinës. Ditë më parë, Kina publikoi vija të reja për këtë pjesë, përfshirë edhe koordinata gjeografike. Tensionet mes Kinës dhe Filipineve janë rritur lidhur me pretendimet për Cekëtinën e Skarboros dhe pjesëve të tjera në Detin Jugor të Kinës. Në këto zona ka pasur edhe përplasje serioze, pasi Rojet Bregdetare të Kinës kanë përdorur topat e ujit mbi anijet e Filipinneve. “Ky është një aktivitet patrullues që u krye nga trupat detare, në bazë të ligjit”, tha komanda qendrore e ushtrisë kineze përmes një deklarate. Kina e mori këtë cekëtinë, që gjendet në perëndim të ishullit Luzon të Filipineve, më 2012 dhe që atëherë nuk lejon që peshkatarët e Filipineve të peshkojnë në atë zonë. Më 2016, Gjykata Ndërkombëtare e Arbitrazhit gjeti se shumica e pretendimeve të Kinës për Detin Jugor të Kinës ishin të paqëndrueshme, por Pekini ka refuzuar që ta respektojë këtë vendim. Departamenti për Punë të Jashtme i Filipineve ka thirrur ambasadorin kinez në Manila për të protestuar për përkufizimin e ri të territorit të bërë nga Kina përreth cekëtinës. Filipinet thanë se vijat e reja gjenden brenda territorit të shtetit dhe shkelin ligjin ndërkombëtar, veçanërisht Konventën e Kombeve të Bashkuara për ligjin për detet dhe vendimin e Arbitrazhit të vitit 2016. Javën e kaluar, presidenti filipinas, Ferdinand Marcos Jr, nënshkroi dy ligje për të riafirmuar territoret e shtetit dhe të drejtën për akses në burime natyrore, përfshirë në Detin Jugor të Kinës, vendim që zemëroi Kinën. Kina pretendon se i gjithë ky det i përket asaj, por pretendime territoriale për të kanë edhe Filipinet, Vietnami, Indonezia dhe qeveri të tjera.