Kompanitë amerikane të teknologjisë kanë shtuar kontrollin mbi të shkuarën e punonjësve dhe atyre që aplikojnë për punë, pas kërcënimit që po paraqet Kina në fushën e spiunazhit kibernetik. ‘Google’, ‘OpenAI’ dhe ‘Sequoia Capital’ janë mes atyre kompanive të teknologjisë që ofrojnë kapital investues, që kanë shtuar kontrollet e sigurisë për punonjësit apo ata potencialë, sipas një raporti të fundit të gazetës ‘The Financial Times’ që tjekson se të gjitha këto kompani po i përgjigjeshin paralajmërimeve të qeverisë amerikane për një kërcënim në rritje nga spiunazhi kinez gjatë dy viteve të fundit. Sipas FBI, qeveria kineze është përpjekur të vjedhë “teknologji dhe materiale kërkimore” nga industritë amerikane. Për të frenuar këtë fenomen Shtëpia e Bardhë ka shtuar masat përfshirë përditësimin e rregulloreve të kontrollit të eksportit me synimin për të kufizuar aftësinë e Kinës për të siguruar mikroprocesorë të avancuar kompjuterike dhe inteligjencë artificiale. Por ndërsa kontrollet mbi të shkuarën po shtohen për aplikantët dhe punonjësit e të gjitha racave, ata me lidhje familjare me Kinën mendohet se janë kryesisht subjekt i presionit që ushtrohet nga qeveria e Pekinit.