Koreja e Jugut tha se ka dorëzuar notë proteste te përfaqësuesit e Kinës dhe Rusisë më 10 dhjetor, një ditë pasi Seuli tha se avionët ushtarakë të këtyre shteteve hynë në zonën e tij të mbrojtjes ajrore. Seuli tha se ankesa iu dorëzua atasheve të mbrojtjes të dy shteteve që gjenden në kryeqytetin e Koresë së Jugut. “Ushtria jonë do të vazhdojë të përgjigjet në mënyrë aktive ndaj aktiviteteve të avionëve të shteteve fqinje brenda zonës së mbrojtjes ajrore, në përputhje me të drejtën ndërkombëtare”, tha Lee Këang-suk, drejtor i përgjithshëm i Byrosë të Politikave Ndërkombëtare në Ministrinë e Mbrojtjes të Seulit, duke iu referuar Zonës së Identifikimit të Mbrojtjes Ajrore të Koresë. Koreja e Jugut tha të martën se kishte dislokuar “avionë luftarakë për të ndërmarrë masa taktike në përgatitje të çdo situate” në përgjigje të inkursionit kinez dhe rus në zonën e mbrojtjes ajrore.