Presidenti i Kinës Xi Jinping kërkoi të martën të zgjerojë investimet e ndërsjella me Rusinë dhe konfirmoi angazhimin e Pekinit për të avancuar lidhjet pavarësisht kushteve të jashtme "të trazuara", raportuan mediat shtetërore kineze. Xi u takua me kryeministrin rus Mikhail Mishustin në Pekin, një ditë pasi kryeministri kinez Li Qiang zhvilloi një takim me homologun rus, ku Li tha se Kina dëshironte të forconte bashkëpunimin me Rusinë dhe të mbronte interesat e përbashkëta të sigurisë. Kremlini ka theksuar rëndësinë e vizitës së kryeministrit rus në një kohë kur Rusia është nën sanksione të mëdha perëndimore për shkak të luftës në Ukrainë. "Ruajtja, konsolidimi dhe zhvillimi i marrëdhënieve Kinë-Rusi është një zgjedhje strategjike për të dyja palët", tha presidenti I Kinës Xi. Ai theksoi industritë si energjia, bujqësia, hapësira ajrore, ekonomia dixhitale dhe zhvillimi i gjelbër, ku të dy vendet mund të përparojnë bashkëpunimin dhe të nxisin motorë të rinj rritjeje. Kryeministri rus Mishustin tha se ishte e rëndësishme që të dyja palët të vazhdojnë të krijojnë kushte të favorshme për tërheqjen e investimeve të ndërsjella dhe mbështetjen e projekteve të përbashkëta, sipas agjencisë së lajmeve TASS të Rusisë.