Udhëheqësi i Koresë së Veriut Kim Jong Un bëri thirrje për ndërtimin e një ushtrie të fortë dhe moderne për të përballuar çdo luftë gjatë një vizite në një akademi ushtarake, tha media shtetërore KCNA të mërkurën. Vizita e Kim në Akademinë Ushtarake Kang Kon vjen pasi Koreja e Veriut ka dërguar mijëra trupa në Rusi për të mbështetur luftën e saj kundër Ukrainës. Këtë javë Kim vizitoi gjithashtu Universitetin e Politikës Kim Il Sung, një tjetër institucion trajnimi i kuadrove elitare, duke bërë thirrje për besnikëri dhe sakrificë ushtarake. Agjencia e inteligjencës e Koresë së Jugut ka thënë se inspektimet e mëparshme të Kim të njësive ushtarake dhe trajnimi mund të jenë pjesë e përgatitjeve për një dërgim shtesë të ushtarëve në Rusi. Gjatë vizitës së fundit në akademinë ushtarake, Kim kritikoi menaxhimin e dobët të shkollës dhe funksionimin e objekteve arsimore, duke thënë se ajo nuk arriti të përmbushte direktivat e partisë në pushtet për "modernizim dhe kapacitet të avancuar" në ndërtimin e një ushtrie të fuqishme, tha KCNA. Ai përcaktoi detyra për të rinovuar objektet dhe për të intensifikuar arsimin duke u fokusuar në praktikë, në mënyrë që rekrutët të mësojnë rreth "përvojave aktuale të luftës moderne" dhe të zotërojnë armët dhe pajisjet teknike të përparuara. "Situata e tanishme ndërkombëtare, në të cilën natyra agresive dhe luftarake e imperialistëve shprehet më hapur se kurrë në histori dhe lufta dhe gjakderdhja janë bërë të zakonshme, kërkon që forcat e armatosura të përballen në mënyrë të përsosur me luftën," tha Kim jong un. Zyrtarët e Koresë së Jugut kanë paralajmëruar se Koreja e Veriut mund të përfitojë nga furnizimi me armë dhe trupa për të luftuar në Rusi për fituar përvojë dhe njohuri nga operimi në një fushë beteje moderne. Kyiv ka thënë se forcat e Koresë së Veriut kanë pësuar humbje të rënda në Rusi, me më shumë se 3,000 ushtarë të vrarë ose të plagosur deri në fillim të janarit të këtij viti.