Ukraina po përgatitet për një sulm të madh rus, në shenjë hakmarrjeje ndaj përdorimit të një ditë më parë të raketave ATACMS të furnizuara nga SHBA për të goditur territorin rus ndërkohë që Moska paralajmëroi se do të "reagonte në përputhje me rrethanat". Vladimir Putin ka paralajmëruar vazhdimisht se Moska do t'i përgjigjet sulmeve të Ukrainës me armë të prodhuara nga SHBA-ja thellë në Rusi. Në shtator, ai tha se kjo "do të thotë se vendet e NATO-s janë në luftë me Rusinë". Dhe vetëm disa ditë pasi SHBA miratoi përdorimin e raketave të saj me rreze të gjatë veprimi, Putin nënshkroi doktrinën e re bërthamore të vendit. Pothuajse në të njëjtën kohë, mediat ukrainase raportuan përdorimin e parë të raketave ATACMS në territorin rus. Ushtria e Ukrainës nuk ka bërë ende komente për armët e përdorura, por mori përgjegjësinë për një sulm mbi një depo armësh në qytetin Karachev, të Brianskut, mbi 100 km larg kufirit. Kremlini në anën tjetër pretendoi se Ukraina kishte lëshuar gjashtë ATACMS - duke pretenduar se ato nuk shkaktuan dëme serioze. Sipas tij, kjo shënon shkeljen e një vije të kuqe, cka vendos zyrtarisht në tryezë opsionin e hakmarrjes bërthamore. Të mërkurën, Ukraina konfirmoi se Rusia po përgatit një "seri sulmesh". Andriy Kovalenko, kreu i Qendrës së Këshillit të Sigurimit të Ukrainës për Kundër Dezinformimin, tha: "Më lejoni t'ju kujtoj se rusët kanë grumbulluar raketa për një seri sulmesh në Ukrainë për muaj të tërë. Kjo përfshin raketat Kh-101, të cilat ata vazhdojnë ti prodhojnë, si dhe raketat Kalibr dhe ato balistike."