Presidenti amerikan Donald Trump tha se Kievi mund ta "rifitojë të gjithë Ukrainën, në formën e saj origjinale", duke shënuar një ndryshim të madh në qëndrimin e tij ndaj luftës me Rusinë. Në një postim në platformën e tij Truth Social, ai tha se Ukraina mund të rifitojë "kufijtë origjinalë nga ku filloi kjo luftë" me mbështetjen e Evropës dhe NATO-s, për shkak të presioneve mbi ekonominë e Rusisë. Komentet e tij erdhën pas bisedimeve me Presidentin ukrainas Volodymyr Zelensky, të mbajtura pasi Trump iu drejtua Asamblesë së Përgjithshme të OKB-së në Nju Jork të martën. Trump ka shprehur vazhdimisht dëshirën e tij për t'i dhënë fund luftës, por më parë ka paralajmëruar se procesi ka të ngjarë të përfshijë heqjen dorë nga Ukraina të një pjese territori, një rezultat që Zelensky e ka refuzuar vazhdimisht. Në postimin e tij, Trump shtoi se Ukraina mundet "ndoshta të shkojë edhe përtej kësaj", por nuk specifikoi se për çfarë po fliste. Ai gjithashtu nuk bëri asnjë referencë për Krimenë, e cila u pushtua dhe u aneksua nga Rusia në vitin 2014. Rusia nisi pushtimin e saj të plotë të Ukrainës në vitin 2022. Trump tha se qëndrimi i tij kishte ndryshuar "pasi u njoh dhe e kuptoi plotësisht situatën ushtarake dhe ekonomike mes Ukrainës dhe Rusisë". "Putini dhe Rusia janë në probleme të MËDHA dhe kjo është koha që Ukraina të veprojë", shtoi ai, duke e etiketuar Rusinë si një "tigër letre". Zelensky përshëndeti "ndryshimin e madh" në qëndrimin e Trump dhe, duke folur me gazetarët në ndërtesën e OKB-së, tha se e kuptonte që SHBA ishte e gatshme t'i japë Ukrainës garanci sigurie "pasi të mbaronte lufta". Duke folur më vonë në Fox Neës, Zelensky tha se postimi i Trump në Truth Social në lidhje me pozicionimin e Ukrainës e habiti, por e mori atë si një "sinjal pozitiv" se Trump dhe SHBA-të "do të jenë me Ukrainën deri në fund të luftës". Më herët të martën, pas fjalimit të tij në OKB, Trump tha gjithashtu se vendet e NATO-s duhet të rrëzojnë aeroplanët rusë që shkelin hapësirën e tyre ajrore, pas një serie ndërhyrjesh të fundit nga avionë luftarakë dhe dronë rusë.