Ukraina do t'i kërkojë BE-së javën e ardhshme të shqyrtojë hapa të reja për të izoluar Moskën, duke përfshirë sekuestrimin e aseteve ruse dhe vendosjen e sanksioneve për disa blerës të naftës ruse, pasi Presidenti amerikan Donald Trump është tërhequr nga shtrëngimi i sanksioneve. Një i ashtuquajtur ‘dokument i bardhë’ ukrainas, i pa raportuar më parë, që do t'i paraqitet BE-së, bën thirrje që blloku me 27 anëtarë të marrë një qëndrim më agresiv dhe të pavarur ndaj sanksioneve, ndërsa pasiguria rritet për shkak të dyshimeve për rolin e ardhshëm të Uashingtonit. Mes 40 faqeve me rekomandime bëjnë pjesë edhe thirrjet për të miratuar legjislacion që do të përshpejtonte sekuestrimin nga BE-ja të aseteve nga individët e sanksionuar dhe dërgimin e tyre në Ukrainë. Individët nën sanksione mund të kërkojnë kompensim nga Rusia. BE-ja ndërkohë duhet të shqyrtojë një sërë hapash për t'i bërë sanksionet e saj që të zbatohen me më shumë forcë përtej territorit të saj, duke përfshirë shënjestrimin e kompanive të huaja që përdorin teknologjinë e tyre për të ndihmuar Rusinë dhe "futjen e sanksioneve dytësore mbi blerësit e naftës ruse". Sanksione të tilla dytësore, të cilat mund të godasin blerësit e mëdhenj si India dhe Kina, do të ishin një hap i madh që Evropa deri më tani ka hezituar ta ndërmarrë. Pasi bisedoi në telefon me Putinin të hënën, Trump vendosi të mos vendosë sanksione të reja ndaj Rusisë, duke shuar shpresat e udhëheqësve evropianë dhe Kievit, të cilët kishin lobuar me të për javë të tëra për të rritur presionin ndaj Moskës. Trump foli me udhëheqësit ukrainas dhe evropianë pas telefonatës me Putinin dhe u tha atyre se nuk donte të vendoste sanksione tani dhe të jepte kohë që të zhvilloheshin bisedime. Në anën tjetër BE dhe Britania vendosën sanksione shtesë kundër Rusisë të martën, duke thënë se ende shpresojnë që Uashingtoni t'u bashkohet atyre. Por evropianët po diskutojnë hapur mënyrat se si mund të vazhdojnë presionin mbi Moskën nëse Uashingtoni nuk është më i përgatitur të jetë pjesë.