Trupat amerikane, letoneze, polake, turke dhe gjermane të udhëhequr nga KFOR, kanë zhvilluar operacione ajrore në pjesën veriore, në kuadër të stërvitjeve për ngritjen e aftësive ndërvepruese dhe gatishmërisë operacionale. Sipas një reagimi në FaceBook, NATO shprehet se operacionet të kryera si gjatë ditës ashtu edhe natës me mbështetje të njësive ajrore, u mundësojnë patrullave të arrijnë zonat kyçe përgjatë kufirit, duke forcuar ndërveprimin, koordinimin dhe gatishmërinë operacionale mes forcave të KFOR-it në rajon. KFOR-i thekson më tej se aktivitete të tilla janë thelbësore për ruajtjen e kohezionit dhe gatishmërisë së njësive operacionale, duke garantuar që misioni të rrisë efektivitetin në mbështetjen e një mjedisi të qetë dhe të sigurt për të gjithë qytetarët në Kosovë. KFOR-i është reaguesi i tretë i sigurisë në Kosovë, pas Policisë së Kosovës dhe misionit të Bashkimit Evropian për sundimin e ligjit, EULEX. Misioni i NATO-s ka rol kyç në ruajtjen e sigurisë përgjatë vijës kufitare mes Kosovës dhe Serbisë. Prania e KFOR-it u shtua gjatë vitit 2023, pas rritjes së tensioneve në veriun e Kosovës. Aktualisht, misioni paqeruajtës i NATO-s numëron mbi 4.600 trupa nga 33 shtete anëtare dhe partnere.