Misioni paqeruajtës i NATO-s në Kosovë, KFOR, mëngjesin e 29 majit ka shtuar prezencën në komunat në veri të Kosovës, të banuara me shumicë serbe. Gazetarët në terren kanë raportuar për prani të shtuar të KFOR-it në Zveçan, Leposaviq dhe Zubin Potok, komuna ku ditëve të fundit ka pasur rritje të tensioneve. Serbët lokalë të këtyre komunave u mblodhën sërish mëngjesin e të hënës për të kundërshtuar kryetarët e rinj shqiptarë, të zgjedhur në zgjedhjet lokale të 23 prillit. Shefi i NATO-s, Jens Stoltenberg, një ditë më parë i bëri thirrje Kosovës që të mos ndërmarrë “hapa të njëanshëm dhe destabilizues” në veri të Kosovës. Ai tha se kishte biseduar për situatën në Kosovë me përfaqësuesin e lartë të BE-së për politikën e jashtme, Joseph Borrell dhe se kjo është koha për dialog dhe bisedime, jo për tensionime. Shqetësimi i shefit të aleancës perëndimore të mbrojtjes, është në një linjë me atë të kancelarive të tjera perëndimore, të cilat pas ngjarjeve të së premtes i kërkuan qeverisë së kosovës të marrë masa për shtensionimin e situatës. Vetë Kryeministri i Kosovës, Albin Kurti, ka deklaruar se i kupton shqetësimet e partnerëve ndërkombëtarë, por “çdo opsion tjetër do të ishte mospërmbushje e obligimeve kushtetuese”.