Bashkia Dimal ka zhvilluar një mbledhje emergjente të Këshillit Bashkiak, ku është diskutuar propozimi për shkrirjen e bashkisë dhe bashkimin e saj me Bashkinë Berat. Pas shqyrtimit të relacionit, 18 nga 21 anëtarët e Këshillit Bashkiak votuan kundër shkrirjes së Dimalit. Në nisje të mbledhjes u lexua relacioni ku argumentoheshin arsyet për bashkimin me Beratin. Sipas këshilltarëve të Dimalit, në relacion janë paraqitur si arsye lidhja historike mes zonave, shtrirja përgjatë lumit Osum dhe ekzistenca e Spitalit Rajonal në Berat. Ata pretendojnë se këto argumente nuk përputhen me analizën e paraqitur në raportin e ekspertëve. Këshilltarët sollën si argument edhe performancën financiare të bashkisë. Sipas tyre, gjatë 10 viteve të fundit Dimal ka pasur një mesatare prej 38% të investimeve të kryera me buxhetin e vet aktiv, duke u renditur e pesta në rang vendi, ndërsa Bashkia Berat, sipas tyre, ka pasur një mesatare prej rreth 7%.