Presidenti francez Emmanuel Macron po kërkon kryeministrin e tij të gjashtë në më pak se dy vjet, duke shpresuar që zgjedhja e tij e radhës të mund të kalojë një buxhet përmes një legjislature të copëtuar dhe shkatërruar nga kriza. Zyra e Macron tha të mërkurën se ai do të emërojë një kryeministër të ri brenda 48 orësh, pasi kryeministri në largim Sebastien Lecornu zhvilloi dy ditë bisedime për të kërkuar një rrugëdalje nga kriza më e rëndë politike e Francës në historinë moderne. Paraliza politike e ka bërë shumë të vështirë miratimin e një buxheti shtrëngues, të kërkuar nga investitorët gjithnjë e më të shqetësuar nga deficiti në rritje i Francës. "Pyetja që ngrihet është nëse ka mjaftueshëm njerëz të përgjegjshëm" tha zëdhënësja e qeverisë Aurore Berge të enjten në mëngjes. "Mendoj se ky është shansi i fundit", shtoi ajo. Lecornu paraqiti dorëheqjen e tij dhe të qeverisë të hënën, disa orë pasi njoftoi përbërjen e kabinetit, duke e bërë atë administratën më jetëshkurtër në Francën moderne. Ai tha në një intervistë televizive të mërkurën në mbrëmje se puna e tij tani kishte mbaruar. Ai theksoi se kishte mësuar nga bisedimet se shumica e ligjvënësve kundërshtuan mbajtjen e zgjedhjeve të parakohshme parlamentare, se kishte një rrugë drejt miratimit të një buxheti deri në fund të vitit dhe se do të ishte e mundur të zhvillohej një debat mbi reformën e pensioneve.