Sekretari amerikan i Shtetit Antony Blinken i kërkoi Izraelit të mërkurën që të shfrytëzojë mundësinë e krijuar nga vdekja e liderit të Hamasit Yahya Sinvar dhe shkatërrimi i një pjese të madhe të kapaciteteve të gruput në më shumë se një vit konflikt, për t'i dhënë fund luftës në Gaza. Blinken tha se Izraeli ka arritur të sigurojë se nuk mund të përsëritet më sulmi i 7 tetorit 2023 që shkaktoi edhe luftën në Gaza dhe se duhet të kërkojë tani të kthejë në shtëpi 101 pengjet e mbetura izraelitë dhe të huaj e t'i japë fund luftimeve. "Tani është koha për t'i kthyer ato suksese në një sukses strategjik të qëndrueshëm," u tha ai gazetarëve ndërsa përgatitej të nisej për në Riad në fazën tjetër të vizitës së tij në Lindjen e Mesme. "Fokusi duhet të jetë në kthimin e pengjeve në shtëpi, përfundimin e kësaj lufte dhe hartimin e një plani të qartë për atë që do të vijë", tha ai.