Partia Demokratike po grumbullon cdo parregullsi të procesit zgjedhor. Sekretari për çështjet ligjore të selisë blu dhe njëkokësisht përfaqsuesi i saj në Komisionin Qendror të zgjedhjeve deklaroi se materialet nuk do të shkojnë vetëm në SPAK por edhe në institucionin që ka detyrimin ligjor për administrimin e zgjedhjeve. Mbi të gjitha kërkesa e demokratëve ka të bëjë me rinumërimin e votave. “Materialet që ne po nxjerrim do të çohen jo vetëm në SPAK dhe KQZ por besojmë se ato do të çojnë drejt procesit të rinumërimit dhe rivlerësimit të një numri të caktuar votash dhe kutish. Besojmë se një numër i caktuar votash do të rinumërohen dhe rivlerësohen në kuadër të procesit ankimor. Kodi i ri iu mundëson hapjen e kutive për rregullshmërinë e procesit zgjedhor dhe partive të vogla. PD kërkon të herë dritë mbi këtë proces të errët zgjedhor i karakterizuar me parregullsi të shumta” Në periudhën parazgjedhore Partia Demokartike ka depozituar në prokurori 180 kallzime penale dhe mbi 40 në SPAK. Pranë Komisionit Qendor të Zgjedhjeve janë miratuar rezultatet e zgjedhjeve për qarkun e Kukësit, për të cilin nuk kishte asnjë kontestim nga përfaqësuesit politikë, ndërsa pritet edhe miratimi për 11 qarqet e tjera pas verifikimit dhe rinumërimit që do të bëhet për ato qarqe të cilat do të paraqiten ankimime. Më tej, pas mbylljes së këtij procesi dhe kalimit të materialeve përmes Komisionit të Ankimimeve dhe Sanksioneve dhe Komisionit Rregullator, Kryekomisioneri i Komisionit Qendror të Zgjedhjeve, Ilirjan Celibashi do të certifikojë zgjedhjet e 25 prillit dhe listat e deputetëve fitues. Dhe nëse pas këtij vendimi ka sërish padakordësi, atëherë vendimi final është në dorën e Kolegjit Zgjedhor.