Gjykata Themelore në Prishtinë, ka dënuar me gjashtë muaj burgim Kadri Xhemajlin, i cili ka pranuar fajësinë për kanosjen e kryeministrit të Kosovës, Albin Kurti. Xhemaili e ka pranuar fajësinë dhe ka kërkuar falje në seancën gjyqësore të premten. Xhemajli ishte akuzuar nga Prokuroria Speciale se më 22 tetor 2025, përmes një komenti të publikuar në rrjetin social Facebook, kishte kanosur Kurtin. Paraprakisht, gjykata kishte aprovuar marrëveshjen për pranimin e fajësisë ndërmjet Prokurorisë Speciale dhe të akuzuarit. Sipas marrëveshjes, ishte rekomanduar që Xhemajli të dënohej me një vit burgim me kusht, mirëpo gjykata nuk e ka aprovuar rekomandimin lidhur me dënimin, duke caktuar masën, gjashtë muaj burgim. Sipas aktakuzës, Xhemajli ka kryer veprën penale të “Kanosjes”. Në seancën e kësaj të premteje ka munguar i dëmtuari Albin Kurti. Gjyqtari I cështjes ka deklaruar se Kurti e ka pranuar ftesën, ndërsa mungesën nuk e ka arsyetuar.