Paralajmërimet po shtohen në Evropë rreth nevojës për përgatitje për luftë përballë një "kërcënimi në rritje" nga Rusia, me shefat e Mbrojtjes që kanë dhënë alarmin që nga Konferenca e Berlinit. Ministri gjerman i Mbrojtjes, Boris Pistorius, u bëri thirrje aleatëve evropianë që të zgjerojnë shpejt aftësitë e tyre mbrojtëse, ndërsa e përshkroi rajonin e Detit Baltik si "fushë prove" të Vladimir Putinit dhe sulmet e tij hibride si "strategji" dhe "paralajmërues". “Situata e sigurisë në Evropë është shumë serioze dhe kërcënimi nga Rusia është real”, theksoi ai, ndërsa nënshkroi me homologun e tij suedez, Poul Johnson, një marrëveshje për të intensifikuar bashkëpunimin dypalësh në fushën e sigurisë dhe mbrojtjes, me veprime të përbashkëta në arsim dhe teknologji të reja. "Shumë njerëz në Evropë do ta kishin konsideruar pushtimin e Ukrainës nga Rusia të paimagjinueshëm disa vite më parë. Por agresioni i Rusisë nuk kufizohet vetëm në nivelin rajonal.", shtoi ai ndërsa akuzoi Moskën se tashmë po kryen sulme hibride kundër të gjithë vendeve të NATO.