Një sfidë e re, e quajtur “Sfida e Sipermenit” e cila po qarkullon në platformën Tik Tok, ka ngritur alarmin, pasi në disa vende të Europës, shumë adoleshentë kanë përfunduar me fraktura në spital. Paralajmërimi është ngritur edhe nga kryetarja e Autoritetit të Medias Audiovizive, Armela Krasniqi, e cila përmes një njoftimit në rrjetet e saj sociale, ka bërë thirrje për prindërit dhe adoleshentët. “Sfida e Supermenit” konsiston në hedhjen me njërën dorë përpara, njësoj si personazhi për fëmijë, Superman, për t’u kapur, ose jo, nga miqtë. ‘Dhjetëra adoleshentë në Rumani kanë pësuar fraktura dhe trauma të rënda pas një tendence në TikTok të quajtur, "Sfida e Supermenit"’, shkruan Krasniqi në FB. Sipas saj në vetëm brenda një dite në Rumani, mbi 20 adoleshentë kanë përfunduar në spital me trauma të rënda. Krasniqi iu ka bërë thirrje prindërve që t’iu shpjegojnë fëmijëve të tyre rrezikun që fshihet pas tendencave të tilla online!