Kur presidenti rus, Vladimir Putin njoftoi pushtimin e Ukrainës më 24 shkurt, ai deklaroi: “Pavarësisht se kush përpiqet të na pengojë ose … të kërcënojë vendin dhe popullin tonë, ata duhet ta dinë se Rusia do të përgjigjet menjëherë, dhe pasojat do të jenë të tilla që nuk i keni parë kurrë në tërë historinë tuaj. Rusia sot mbetet një nga shtetet më të fuqishme bërthamore," tha Putin. Pushtimi rus deri tani është mbështetur tërësisht në armët konvencionale të tilla tanket që qarkullojnë në autostrada, bombardues dhe luftanije. Sipas përllogaritjevë të gazetës amerikane VOX, Rusia ka rreth 6,000 armë bërthamore dhe Shtetet e Bashkuara kanë rreth 5,500. Arsenali bërthamor është aq i madh sa mund të vrasë miliarda njerëz. Në dekadat e fundit, i ashtuquajturi rendi bërthamor ka mbetur mjaft i qëndrueshëm. Shtatë vendet e tjera të njohura se kanë armë bërthamore kanë arsenale shumë më të vogla. Shumica e vendeve në botë kanë nënshkruar Traktatin për Mospërhapjen e Armëve Bërthamore, i cili kufizon përdorimin e armëve bërthamore. Vendet që kanë armë bërthamore janë Rusia, SHBA, Kina, Franca, Britania e Madhe, Pakistani, India, Izraeli dhe Koreja e Veriut. Kjo përfshin çdo anëtar të përhershëm të Këshillit të Sigurimit të Kombeve të Bashkuara, të cilët kanë punuar për të modernizuar armët e tyre bërthamore gjatë dekadave të fundit, dhe tre anëtarë të Organizatës së Traktatit të Atlantikut të Veriut. Numri i përgjithshëm i armëve ka rënë me rreth 80 për qind që nga fundi i Luftës së Ftohtë. Por, a ka Putin një arsye për të përdorur armët bërthamore? Nga pikëpamja strategjike, ekspertët thonë, se nuk ka asnjë arsye që Rusia të përdorë armë bërthamore. Por deklaratat e shpeshta kërcënuese të Putin lidhur me arsenalin bërthamor, apo edhe ambicia e tij e madhe për pushtet, e lenë këtë pyetje pa përgjigje. Në vitin 2015, Putin tha në një dokumentar televiziv shtetëror rus se e kishte konsideruar vendosjen e forcave bërthamore ruse në gatishmëri gjatë aneksimit rus të Krimesë. Eksperti Zack Beauchamp tha për Vox se, kërcënimi i armëve bërthamore është arsyeja pse SHBA nuk do të dërgojnë trupa në Ukrainë. Që nga Lufta e Ftohtë, është pranuar gjerësisht se parandalimi bërthamor do të ndihmonte për të siguruar që kufijtë e Evropës nuk do të sfidoheshin. Në artikullin e Vox, shkruhet se tashmë i gjithë rendi ndërkombëtar po hidhet në erë, duke ngritur pyetjet a do të jetë sulmi në Ukrainë një prelud i një sulmi, ndaj shteteve baltike që janë edhe më të cenueshme, apo Putini do të mjaftohet vetëm me Ukrainën? Pamjet: AFP