Kremlini tha të martën se një urdhër nga presidenti Vladimir Putin për të transformuar ushtrinë ruse në ushtrinë e dytë më të madhe në botë është i domosdoshëm për të adresuar kërcënimet në rritje në kufijtë perëndimorë të Rusisë dhe paqëndrueshmërinë në lindje. Putin urdhëroi të hënën që numri i rregullt i ushtrisë ruse të rritet me 180,000 trupa, për të shkuar në 1.5 milionë ushtarakë aktivë, në një masë që do ta bënte atë të dytën më të madhe në botë pas asaj të Kinës. "Kjo është për shkak të numrit të kërcënimeve që ekzistojnë përgjatë perimetrit të kufijve tanë," tha zëdhënësi i Kremlinit Dmitry Peskov për gazetarët. "Kjo është shkaktuar nga mjedisi jashtëzakonisht armiqësor në kufijtë tanë perëndimorë dhe paqëndrueshmëria në kufijtë tanë lindorë. Kjo kërkon që të merren masat e duhura". Një rritje e tillë do të bënte që Rusia të kapërcente Shtetet e Bashkuara dhe Indinë për sa i përket numrit të ushtarëve aktivë luftarakë që ka në dispozicion dhe të jetë e dyta për nga madhësia, pas Kinës. Andrei Kartapolov, kryetar i komitetit të mbrojtjes në dhomën e ulët të Parlamentit rus, tha të hënën se një pjesë e arsyetimit për zgjerimin e ushtrisë, ishte edhe ngritja e strukturave dhe njësive të reja ushtarake për të përmirësuar sigurinë në veriperëndim të Rusisë pasi Finlanda fqinje iu bashkua aleancës së NATO-s. Rusia ka shprehur gjithashtu shqetësime për atë që e përshkruan si militarizimin në rritje të Japonisë të mbështetur nga SHBA dhe planet e mundshme për të vendosur raketa amerikane atje.