Policia tha të enjten se një mjet i dyshimtë afër Capitolit dhe librarisë së Kongresit, po kontrollohej për lëndë eksplozive dhe se njerëzve u ishte kërkuar të largoheshin nga zona. Bëhet fjalë për një hetim për kërcënim me bombë – thanë zyrtarët. Byroja federale e Investigimit tha se i ishte bashkuar hetimit. Mediat amerikane raportuan se një burrë në një kamioncinë kishte kërcënuar me bombë dhe se agjentët kishin angazhuar edhe negociatorët në përpjekje për të asgjësuar kërcënimin. Ndërtesa kryesore e librarisë së Kongresit u evakua dhe zyrat e senatit po ashtu. Zyrat qendrore të komitetit kombëtar republikan aty afër u zbrazën ndërkohë që senati dhe dhoma e përfaqësuesve janë aktualisht me pushime, por anëtarët e stafit po punojnë në kompleks. Tensionet janë të larta në Capitol Hill, kur kanë kaluar më shumë se shtatë javë nga rebelimi vdekjeprurës i 6 janarit, kur mbështetësit e ish presidentit Donald Trump sulmuan ndërtesën, u përballën me policinë dhe tentuan të bllokonin certifikimin e rezultatit të zgjedhjeve. Në prill, një burrë përplasi makinën në rrethimin e kapitol Hillit duke vrarë një oficer policie para se vetë agresori të qëllohej për vdekje.