Fredi Belerit iu deshën vetëm pak orë liri për të provokuar me deklarata nacionaliste nga Athina. Ish-kryebashkiaku i pabetuar përcolli nga kryeqytetit grek një mesazh për banorët e Himarës. “Himarjotëve duhet t’u them se nuk janë vetëm, kanë nënën Greqinë për t’i mbrojtur. Herët a vonë do të shfajësohen”, tha ai. Deklarata provokuese e Belerit, zgjedhur eurodeputet në parlamentin europian nga listat e partisë së Kryeministrit grek, Kiriakos Mitsotakis rindez debatin mbi çështjen e minoritetit. Zyrtarisht, Shqipëria nuk ka një minoritet grek në Himarë dhe mbi 80 për qind e popullsisë në këtë bashki identifikohen me kombësi shqiptare. Megjithatë, përballë influencës dhe ndërhyrjes së Athinës në proceset zgjedhore në këtë bashki, dy kandidatët e dalë për zgjedhjet e 4 gushtit janë minoritarë. Vangjel Tavo, politikan veteran i minoritetit grek të Dropullit do të jetë përballë biznesmenit Petro Gjikuria, që e identifikon veten si grek. Deklaratat e tij në të shkuarën janë të ngjyrosura me nuanca nacionaliste. Kandidimi i tij ka ngjallur kundërshti në radhët e degës së Partisë Demokratike të Himarës.