Një deputet i parlamentit rus tha të premten se inkursioni ukrainas i mbështetur nga Perëndimi e ka sjellë botën pranë një lufte globale gjithëpërfshirëse, njoftoi agjencia ruse e lajmeve RIA. Trupat ukrainase kaluan kufirin në rajonin e Kurskut në Rusi, më 6 gusht, dhe që atëherë kanë avancuar ndjeshëm, duke e detyruar Moskën të evakuojë mbi 200,000 njerëz nga shtëpitë e tyre. “Duke marrë parasysh praninë e pajisjeve ushtarake perëndimore, përdorimin e municioneve dhe raketave perëndimore në sulmet ndaj infrastrukturës civile dhe provave të pakundërshtueshme të pjesëmarrjes së të huajve në sulmin në territorin rus, mund të arrihet në përfundimin se bota është në prag të Luftës së Tretë Botërore”, citon RIA të ketë thënë deputeti Mikhail Sheremet. Ky i fundit është anëtar i komitetit të mbrojtjes të parlamentit rus, dhe i bëri jehonë deklaratave të Putinit duke thënë se vendet e NATO-s i kishin dhënë dritën jeshile planeve të inkursionit, një akuzë që Uashingtoni e ka mohuar. Ndihmësi i Putinit, Nikolai Patrushev, të premten akuzoi gjithashtu Perëndimin se qëndron pas sulmit, në një intervistë për gazetën Izvestia. Patrushev tha se NATO dhe agjencitë e inteligjencës perëndimore ishin të përfshira në planifikimin e operacionit Kursk, megjithëse ai nuk dha asnjë provë.