Presidenti amerikan Donald Trump është diagnostikuar me një gjendje të zakonshme, beninje të venave, tha Shtëpia e Bardhë të enjten, pas spekulimeve rreth dorës së tij të mavijosur dhe këmbëve të ënjtura. 79-vjeçari, i cili në janar u bë personi më i vjetër në histori që mori presidencën, u zbulua se kishte "insufiçencë kronike venoze", u tha gazetarëve Sekretarja e Shtypit Karoline Leavitt. Ndërkohë, mavijosja e vërejtur në dorën e djathtë të Trump ishte "acarim i indeve nga shtrëngimi i shpeshtë i duarve" dhe përdorimi i aspirinës si pjesë e një trajtimi standard kardiovaskular, tha ajo. Mjeku presidencial Sean Barbabella tha se Trump "mbetet në shëndet të shkëlqyer" pavarësisht problemit, në një letër të lëshuar nga Shtëpia e Bardhë. Republikani shpesh mburret me shëndetin e tij të mirë dhe nivelin e energjisë, ndërsa administrata kohët e fundit madje postoi një imazh që e përshkruan atë si Supermen. Trump ka pretenduar se Demokratët mbuluan rënien mendore dhe fizike të paraardhësit të tij, Joe Biden, i cili ishte 82 vjeç kur u largua nga detyra në janar. Tani Trump, i cili tha se pasi iu nënshtrua një kontrolli rutinë mjekësor ishte në "gjendje shumë të mirë", është detyruar t'u përgjigjet pyetjeve në lidhje me shëndetin e tij. Deklarata e Leavitt vjen pas diskutimeve të gjera në internet rreth kyçeve të fryra të këmbëve të presidentit, të vërejtura veçanërisht në finalen e Kupës së Botës për Klube në Neë Jersey, dhe një dore të mavijosur që shpesh dukej se ishte e mbuluar me grim.