Partia Demokratike akuzon se në tenderin e tunelit të Llogarasë janë grabitur nga xhepat e qytetarëve shqiptarë të paktën 75 milionë euro. Deputeti Belind Këlliçi tha se veç 50 milionë eurove me kostot e fryra, projektit i mungojnë edhe dy ura. Sipas tij, në preventiv parashikohej ndërtimi i dy urave me kosto 25 milionë euro. Kjo foto që po ju tregoj është projekti i Tunelit të Llogarasë, të cilin e keni paguar me taksat tuaja, plot 7 milionë euro të tjera. Ndërkohë, në foton nr. 1 dhe foton nr. 2 mund të shihni fare qartë preventivat e kostos së ndërtimit të Tunelit të Llogarasë, ku janë parashikuar edhe këto dy ura. Siç e shihni, bazuar në projekt dhe preventiv, do të duhej të kishim edhe dy ura panoramike në hyrje dhe dalje të tunelit, e meqenëse në gjuhën teknike këto janë “vepra arti”, ndërtimi i tyre e rriti me 25 milionë euro koston e ndërtimit. 25 milionë euro për ndërtimin e dy urave, të cilat në realitet nuk ekzistojnë. Mesa duket, oreksi vjen duke ngrënë dhe 50 milionë euro nuk u mjaftuan, ndaj vendosën të zhdukin edhe 25 milionë euro të tjera, duke zhdukur ndërtimin e urave.