Bisedat telefonike të siguruara nga ana e Prokurorisë së Elbasanit mes pedagogëve të arrestuar nën dyshimet e korrupsionit dhe studentëve tregojnë se kur vjen puna për të rryshfeti, të akuzuarit nuk bënin naze. Mesazhet mes njërës prej pedagogeve të arrestuar dhe një studenteje tregojnë se ajo nuk merrte vetëm para, por në të paktën një rast edhe të mira materiale, përfshirë këtu një thes patate. Në bisedën e zbardhur dhe përfshirë tashmë ne dosjen që po harton prokuroria e Elbasanit, një studente nga zonat rurale e njofton pedagogen në fjalë se i ka sjellë thesin me patate dhe i kërkon një adresë se ku mund t’ja dorëzojë. Pedagoget nën hetim janë Ornela Bilali, Zyhra Gripshi, Beatriçe Gani, Edlira Gugu, Florinda Tarusha dhe Monika Hodaj. Ndërkohë, është arrestuar edhe bashkëshorti i njërës prej tyre, i dyshuar si sekser dhe është shpallur në kërkim një tjetër. Pedagoget e arrestuara janë të punësuara në fakultetin e mësuesisë te cikli i ulët dhe roli i tyre është përgatitja e mësuesve të rinj për arsimin 9-vjeçar. Burimet pohojnë se dyshohet se pedagogët kanë shfrytëzuar postin për të ndikuar si tek pranimet e reja në universitet, ashtu edhe tek nota e studentëve. Në këmbim, ata përfitonin shuma parash që varionin nga 150 deri në 500 euro.