Socialistët u mblodhën në Pallatin e Brigadave, ku shefi i ekzekutivit, Edi Rama dha porositë e tij për ecurinë e punëve në parti e qeveri. Sa i takon procesit të integrimit të Shqipërisë në Bashkimin Europian, Rama kërkoi një komunikim më aktiv me qytetarët për këtë proces. Kryeministri veçoi sigurinë ushqimore si sfidën kyçe të integrimit, për të cilën Shqipëria ka kërkuar një kohë shtesë për përmbushjen e detyrimeve. Për integrimin bënë një pasqyrë të plotë edhe ministri Feri Hoxha së bashku me kryenegociatoren, Majlinda Dhuka. Një vit para zgjedhjeve lokale, Rama u kërkoi deputetëve dhe ministrave të intensifikojnë angazhimin e tyre në terren dhe takimet e drejtpërdrejta me qytetarët. Po ashtu të forcojnë prezencën e tyre në rrjetet sociale dhe të intensifikojnë mesazhet në hapësirën online.