Në zgjedhjet e katërta parlamentare brenda 18 muajsh, partia konservatore e ish-kreut të qeverisë, Bojko Borisov kryeson sipas llogaritjeve të fundit. Por formimi i qeverisë së re bullgare do të jetë i vështirë. Pas zgjedhjeve parlamentare në Bullgari të dielën, partia konservatore e ish-kreut të qeverisë bullgare, Bojko Borisov duket se do të fitojë zgjedhjet në vend. Sipas llogaritjeve paraprake, GERB arrin 25% të votave, pas numërimit të 99% të votave. Kurse partia e re e kryeministrit të rrëzuar në qershor, Kiril Petkov, "Ne vazhdojmë ndryshimin" ka marrë 19-20% të votave. Petkov e pranoi të dielën humbjen në zgjedhje. Votuesit ia dhanë votën Borisovit për formimin e qeverisë, tha Petkov, i cili e përjashtoi një koalicion me GERB. Ish-kryeministri, Bojko Borisov u tregua i hapur për bisedime "me të gjitha partitë" pas mbylljes së kutive të votimit të dielën. Një partner potencial për të do të mund të ishte partia e pakicës turke, MDL, që sipas llogaritjeve të fundit arrin 15% të votave. Edhe dy parti proruse kanë arritur rezultate deri në 15%. Por në parlamentin bullgar mjaft të fragmentarizuar nuk shihen sinjale pozitive për një koalicion të mundshëm. Të treja partitë e koalicionit të fundit qeverisës të partisë të Petokvit, socialistëve dhe Të Gjelbërve liberal-konservatorë, kanë marrë së bashku 37% të votave.