Katër nga nëntë anëtarët e gjykatës kushtetuese kanë qenë pro kërkesës së ish-ministrit të Mjedisit, Lefter Koka për shfuqizimin e dy vendimeve që nuk e lejuan atë të dilte nga qelitë e paraburgimit. Në vendimin e zbardhur, një kopje të të cilit e disponon dhe Top Neës, thuhet se sipas katër gjyqtarëve Marsida Xhaferrllari, Fiona Papajorgji, Sonila Bejtja e Sandër Beci, Kokës I janë shkelur të drejtat që I garanton Kushtetuta. Por ky qëndrim nuk është mbështetur nga shumica që ka vendosur ta rrëzojë ankimimin e bërë nga ish-ministri, I cili kishte në thelb po këtë problemtikë. Lefter Koka është fajësuar për inceneratorin e Fierit dhe atë të Elbasanit ku është dënuar me 6 vjet e 8 muaj dhe 5 vjet e tetë muaj. Vendime që po kundërshtohen në gjykatën e Apelit. Por edhe pse ai kërkonte zbutje të masës për shkak të gjendjes shëndetësore, kërkesa nuk u mor parasysh nga ana e trupit gjykues. “Vlerësojmë se autoritetet shtetërore dhe gjykatat kanë dështuar në përmbushjen e detyrave të tyre për respektimin e të drejtave dhe lirive themelore të kërkuesit në përputhje me garancitë kushtetuese, duke vënë në dyshim mbi të gjitha trajtimin njerëzor të të paraburgosurit”, thuhet në vendimin e zbardhur. Ish-ministri Lefter Koka qëndron në qeli prej dhjetorit 2021.