Ekonomia e Islandës po lë pas shumicën e vendeve të tjera evropiane pas prezantimit të një jave më të shkurtër pune, pa humbje në pagë, sipas një hulumtimi të publikuar së fundi. Mes viteve 2020 dhe 2022, 51% e punëtorëve në Islandë kishin pranuar ofertën e orëve më të shkurtra të punës, duke përfshirë një javë katër-ditore, zbuluan dy institute, duke thënë se shifra ka të ngjarë të jetë edhe më e lartë sot. Vitin e kaluar, Islanda regjistroi një rritje ekonomike më të shpejtë se shumica e vendeve evropiane dhe shkalla e saj e papunësisë është një nga më të ulëtat në Evropë, sipas ekspertëve. Studimi i fundit tregon një histori të vërtetë suksesi: orët më të shkurtra të punës janë përhapur gjerësisht në Islandë... dhe ekonomia është më e fortë në një numër treguesish. Në dy testime të kryera mes 2015-ës dhe 2019-ës, punonjësit e sektorit publik në Islandë punonin 35-36 orë në javë, pa ulje në pagë. Shumë prej pjesëmarrësve ndërkohë kishin punuar më parë për 40 orë në javë. Testimi përfshiu 2500 persona, më shumë se 1% e fuqisë punëtore në Islandë në atë kohë, dhe kishte për qëllim ruajtjen ose rritjen e produktivitetit duke përmirësuar ekuilibrin mes punës dhe jetës. Studiuesit zbuluan se produktiviteti mbeti i njëjtë ose u përmirësua në shumicën e vendeve të punës, ndërsa mirëqenia e punëtorëve u rrit "dramatikisht" në një sërë aspektesh. Pas këtyre testimeve, sindikatat islandeze negociuan reduktimin e orëve të punës për dhjetëra mijëra pjesëtarë të tyre në të gjithë vendin. Si pasojë, në vitin 2023, ekonomia e Islandës u rrit me 5%, norma më e lartë e rritjes kjo ms ekonomive të pasura evropiane, e lënë pas vetëm nga Malta. Ka patur një numër eksperimentesh me javën katër ditëshe të punës në të gjithë botën këto kohë. Kjo përfshin një tetsim të suksesshëm në 2022 në 33 kompani me pjesën më të madhe të tyre të bazuara në SHBA dhe Irlandë.