Zyrtarët ukrainas thanë se mbrojtja ajrore ka rrëzuar 15 raketa kruiz të rusisë që u lëshuan gjatë natës mbi kryeqytetin Kiev. Asnjë i lënduar nuk është raportuar nga sulmi, sipas Serhyi Popko, një zyrtar i lartë ushtarak i Kievit. Ai tha se besohet se raketat ishin lëshuar nga katër bombardues që fluturuan nga rajoni i detit kaspik. Sulmi i ri me raketa erdhi disa orë para se rusia të festonte ditën e fitores. 9 maji, shënon fitoren e bashkimit sovjetik mbi gjermaninë naziste gjatë luftës së dytë botërore. Presidenti rus, Vladimir Putin, ka krahasuar luftën në Ukrainë, që ai e përcakton si një betejë kundër një regjimi neo-nazist, me pushtimin e bashkimit sovjetik nga Adolf Hitleri. Forca ajrore ukrainase shkruante në telegram se gjatë natës së 9 majit, rusia sulmoi territorin e ukrainës. Popko tha se forcat ruse janë përpjekur të vrasin sa më shumë civilë që është e mundur në këtë ditë. Sulmet më të fundit erdhën pasi ukraina tha se rusia lëshoi sulmin më të madh me dronë deri më tani, natën e të dielës. Vala e dronëve dhe sulmeve me raketa i mori jetën të paktën një personi dhe plagosi pesë të tjerë. Ndërsa rusia përgatitet për eventin kryesor të ditës së fitores, një paradë ushtarake, nervozizmi është i dukshëm në Moskë. Një seri shpërthimesh, sulme me dronë dhe sabotazhe kanë prekur rusinë gjatë javës së shkuar, përfshirë edhe një sulm të supozuar me dronë mbi kremlin. Moska ka fajësuar ukrainën për këtë të fundit por Kievi ka mohuar të jetë përfshirë.