Një video e postuar në Facebook nga departamenti i policisë së Gastonias, në shtetin amerikan të Karolinës së Veriut, tregon një tren që përplaset me një kamion që kishte ngecur në shinat hekurudhore në mesin e një stuhie dëbore. Shoferi i kamionit arriti të dilte nga automjeti para përplasjes dhe nuk pati viktima nga incidenti, tha Departamenti i Policisë së Gastonias në Facebook. Kjo vjen ndërsa shtetet jugore të SHBA-së janë përfshirë nga një stuhi e fuqishme bore, duke sjellë temperatura nën zero në rajone që nuk janë mësuar me kushtet vdekjeprurëse të dimrit e duke shkaktuar shumë probleme në udhëtim. Sulmi i fundit i motit ekstrem vjen rreth një javë pasi një tjetër stuhi e fortë goditi një pjesë të madhe të Shteteve të bashkuara duke vrarë më shumë se 100 persona e duke lënë shumë komunitete të mbuluara nga bora dhe akulli. Reshje të mëdha bore ranë në Karolinën e Veriut dhe shtetet fqinje të shtunën, ndërsa autoritetet u bënë thirrje banorëve të qëndronin larg rrugëve dhe paralajmëruan se strukturat buzë oqeanit ishin të kërcënuara nga stuhia. E gjithë Karolina e Veriut dhe e Jugut, si dhe pjesë të Xhorxhias, Tenesit lindor dhe Kentukit, si dhe Virxhinia jugore ishin nën paralajmërim për stuhi dimërore. Karolina e Veriut regjistroi 750 aksidente me makina të shtunën, tha patrulla e autostradës. Stuhia e fundjavës coi në më shumë se 1,800 anulime fluturimesh të shtunën dhe të dielën në Karolinën e Veriut. Më shumë se 600 fluturime u anuluan të shtunën në aeroportin ndërkombëtar të Atlantës, më i ngarkuari në botë. Rreth 50 fluturime brenda dhe jashtë Atlantës u anuluan në orët e para të së dielës.