Pas katastrofës në ishullin italian të Ischias, janë gjetur deri më tani tetë trupa të pajetë ndërsa vazhdojnë gërmimet në kërkim të personave të tjerë që ende konsiderohen të zhdukur. Mes viktimave, sipas zyrtarëve italianë, janë edhe një foshnje e sapolindur dhe dy fëmijë. Katër janë ndërkohë të lënduarit dhe 230 persona kanë mbetur pa strehë. Në ishull mbeten të mbyllura shkollat ndërsa autoritetet kanë shpallur gjendjen e emergjencës. Nga masa e stërmadhe e baltës që ka mbuluar një zonë të gjerë të Casamicciola Terme, mëngjesin e të shtunës, janë nxjerrë deri më tani tetë viktima. Më e fundit, u kthye nga balta mëngjesin e të hënës, dhe bëhet fjalë për një burrë, identiteti i të cilit nuk mund të verifikohej menjëherë. E ndërkohë, vijnë edhe histori tronditëse nga momentet e fundit të viktimave të kësaj tragjedie. Babai i një gruaje rreth të 30-tave, tregoi se e bija i kishte telefonuar duke i kërkuar ndihmë ndërsa masa e dheut po rrëshqiste nga kodra mbi shtëpinë e saj, por ai nuk mundi ta shpëtonte.