Presidenti i shteteve të bashkuara të amerikës, Donald Trump, tha të enjten se Katari do të investojë 10 miliardë dollarë në vitet e ardhshme në Bazën Ajrore Al Udeid në jugperëndim të kryeqytetit të vendit, Doha, objekti më i madh ushtarak amerikan në Lindjen e Mesme. Në një fjalim para trupave amerikane në bazë gjatë turneut të tij në Gjirin Persik, Trump tha gjithashtu se blerjet e mbrojtjes nga Katari të nënshkruara të mërkurën vlejnë 42 miliardë dollarë. Trump më vonë do të shkojë në Emiratet e Bashkuara Arabe, ku udhëheqësit po kërkojnë ndihmën e SHBA-së për ta bërë vendin e pasur të Gjirit një lider global në inteligjencën artificiale. SHBA-të kanë një marrëveshje paraprake me Emiratet e Bashkuara Arabe për t'i lejuar atyre të importojnë 500,000 çipa të Nvidias në vit, që janë edhe çipat më të përparuar të inteligjencës artificiale. Marrëveshja do të nxiste ndërtimin e qendrave të të dhënave në Emiratet e Bashkuara Arabe, të cilat janë jetësore për zhvillimin e modeleve të inteligjencës artificiale. Por marrëveshja ka shkaktuar shqetësime për sigurinë kombëtare. Një sërë marrëveshjesh biznesi janë nënshkruar gjatë vizitës katër-ditore të Trump në rajonin e Gjirit, duke përfshirë një marrëveshje për Qatar Airëays për të blerë deri në 210 avionë Boeing, një angazhim prej 600 miliardë dollarësh nga Arabia Saudite për të investuar në SHBA dhe 142 miliardë dollarë në shitje armësh amerikane në mbretëri. Udhëtimi ka sjellë gjithashtu një mori lëvizjesh diplomatike. Trump bëri një njoftim të papritur të martën se SHBA-të do të heqë sanksionet e hershme ndaj Sirisë dhe më pas u takua me Presidentin e përkohshëm sirian Ahmed al-Sharaa. Ai i kërkoi Sharaa-s të krijojë lidhje me armikun e hershëm të Sirisë, Izraelin. Në Abu Dhabi, Trump do të takohet me Presidentin e Emirateve të Bashkuara Arabe, Sheikh Mohammed bin Zayed Al Nahyan, dhe udhëheqës të tjerë. Trump kishte përmendur edhe mundësinë e një udhëtimi të paplanifikuar në Turqi për t'u bashkuar me bisedimet Rusi-Ukrainë përpara se të kthehej në Uashington, por një zyrtar amerikan tha të mërkurën se presidenti nuk do ta bënte këtë ndalesë.