Gjykata Administrative ka rrëzuar kërkesën e LSI si dhe ka konfirmuar vendimin e Komitetit të Ekspertëve. Në këtë mënyrë mbetet në fuqi karantinimi dy javor për këdo që vjen nga Greqia dhe Maqedonia e Veriut. Lëvizja Socialiste për Integrim dorëzoi pak kohë më parë në Gjykatën Administrative të Tiranës një kërkesë për anulimin vendimit të Komitetit Teknik të Ekspertëve. Sipas Lëvizja Socialiste për Integrim, ky vendim është arbitrar, absurd dhe në shkelje të hapur me Kushtetutën. Gjithashtu e lidhi vendimin e Komitetit Teknik me datën e zgjedhjeve parlamentare të 25 prillit. Sipas padisë, vendimi krijon një dëm të parikuperueshëm ndaj shtetit të së drejtës, si dhe u mohon qytetarëve të drejtën e votës. Ndërkohë sipas Komitetit të Ekspertëve, një masë e tillë u vendos pasi vende fqinje kanë ende shifra të larta ditore të infektimeve.