Emisioni investigativ “Inside Story” ka publikuar këtë javë të dhëna dhe statistika që nxjerrin në pah problematikat e sistemit të drejtësisë në Shqipëri, pas gati një dekade të zbatimit të reformës. Ka kaluar thuajse një dekadë që nga miratimi i reformës në drejtësi, e cila u miratua me 140 vota pro, asnjë kundër, dhe asnjë abstenim, në një seancë maratonë. Pavarësisht entuziazmit të fillimit dhe nevojës urgjente për një ndryshim rrënjësor në sistemin e drejtësisë, efekti i saj ka mbetur i paqartë në shumë segmente të saj. Vakancat që erdhën pas procesit të Vetingut vazhdojnë të mbeten një problem thelbësor për administrimin e drejtësisë. Një tjetër faktor shqetësues është ngarkesa e madhe që kanë gjyqtarët e rinj, të cilët, pas përfundimit të shkollës së magjistraturës, përballen me një fluks të madh dosjesh, duke përjetuar stres dhe mungesë përvoje.