Ky është momenti I arrestimit të 31-vjeçarit, Kejdi Banaj, ndërsa drejtonte automjetin në tunelin e Skërficës. Banaj me precedent në fushën e narkotikëve dhe me banim në Tiranë, mbahej nën vëzhgim nga uniformat blu. Shërbimet e Komisariatit të Policisë Sarandë e arrestuan pas një hetimi me speciale, në kuadër të operacionit të koduar ‘Mekanizmi’, me qëllim identifikimin dhe ndalimin e shtetasve, të cilët përbëjnë rrezik për kryerje të ngjarjeve kriminale dhe për sigurinë e qytetarëve. Nga kontrollet në automjet u gjetën të fshehura në dysheme, 4 armë zjarri (pistoleta) që dyshohet se janë trafikuar në Shqipëri, në pjesë, dhe janë montuar më pas, me qëllim shitjen një grupi kriminal në Sarandë. Policia ka sekuestruar armët e zjarrit dhe automjetin që drejtonte i arrestuari, ndërsa hetimi vijon për identifikimin dhe nxjerrjen përpara përgjegjësisë penale, të shtetasve të tjerë të përfshirë në këtë rast. Sakaq, materialet procedurale iu referuan Prokurorisë, për veprime të mëtejshme.